ராஜஸ்தான் மாநிலத்தில் கணிசமாக வாழும் பிஷ்னோய் இன மக்கள் வன விலங்குகள் மற்றும் மரங்களை பாதுகாப்பதில் முக்கிய பங்காற்றி வருகின்றனர். அவர்கள் பிளாக்பக் வகை மான்களை தங்களது தெய்வமாக கருதுகின்றனர். நடிகர் சல்மான் கான் அந்த மானை வேட்டையாடியதால் அவர் மன்னிப்பு கேட்கவேண்டும் என்று கோரி டெல்லியை சேர்ந்த மாஃபியா கும்பல் தலைவன் லாரன்ஸ் பிஷ்னோய் தொடர்ந்து கொலை மிரட்டல் விடுத்து வருகிறான். சல்மான் கானை கொலை செய்யவும் முயன்றான். லாரன்ஸ் பிஷ்னோய் மீது பஞ்சாப், ஹரியானா, ராஜஸ்தான் மாநிலங்களில் 30க்கும் மேற்பட்ட கொலை, கொலை முயற்சி, மிரட்டி பணம் பறித்தல், கடத்தல் வழக்குகள் நிலுவையில் இருக்கிறது. தற்போது குஜராத் சிறையில் அடைக்கப்பட்டுள்ளான். அதோடு கனடாவில் இந்திய உளவுத்துறை சார்பாக இந்தியாவுக்கு எதிராக செயல்படுபவர்களை கொலை செய்வதாக லாரன்ஸ் பிஷ்னோய் மற்றும் அவனது கூட்டாளிகள் மீது கனடா பிரதமர் குற்றம் சாட்டி இருக்கிறார்.
இந்நிலையில் லாரன்ஸ் பிஷ்னோய் விலங்குகள் பாதுகாப்பு இளைஞரணி தலைவராக தேர்வு செய்யப்பட்டுள்ளார். இது தொடர்பாக அகில இந்திய விலங்குகள் பாதுகாப்பு பிஷ்னோய் சமாஜ் தலைவர் இந்தர்பால் பிஷ்னோய் வெளியிட்டுள்ள அறிக்கையில்,''அகில இந்திய விலங்குகள் பாதுகாப்பு பிஷ்னோய் சமாஜ் கூட்டத்தில் லாரன்ஸ் பிஷ்னோயை அகில இந்திய விலங்குகள் பாதுகாப்பு பிஷ்னோய் சமாஜ் இளைஞரணி தலைவராக ஒருமனதாக தேர்வு செய்யப்பட்டது. விலங்குகள், சுற்றுச்சூழலைப் பாதுகாத்தல் மற்றும் 1730-ல் ராஜஸ்தானில் கெஜாரி மரங்களைக் காப்பாற்ற தங்கள் உயிரைத் தியாகம் செய்த அமிர்தா தேவி பிஷ்னோய் மற்றும் 363 பிஷ்னோயிகளின் பணியை முன்னெடுத்துச் செல்வதும், பாரம்பரியத்தைப் பாதுகாப்பதும் உங்கள் பொறுப்பு''என்று குறிப்பிட்டார்.
லாரன்ஸ் பிஷ்னோய் உறவினர் ரமேஷ் பிஷ்னோய் இது குறித்து வெளியிட்ட வீடியோவில்,'' பிஷ்னோய் இன மக்கள் லாரன்ஸ் பிஷ்னோயை விலங்குகள் பாதுகாப்பு பிரிவு தலைவராக நியமிக்கவேண்டும் என்று கேட்டுக்கொண்டனர்''என்று குறிப்பிட்டார். லாரன்ஸ் பிஷ்னோய் சொந்த ஊர் பஞ்சாப் மாநிலம் துத்ரன்வாலி கிராமம் ஆகும். பஞ்சாப் பாடகர் சிது மூஸ்வாலா மற்றும் மகாராஷ்டிரா முன்னாள் அமைச்சர் பாபா சித்திக்கை கொலை செய்த வழக்கில் குற்றவாளியாக சேர்க்கப்பட்டுள்ள லாரன்ஸ் பிஷ்னோய் கனடாவில் காலிஸ்தான் இனத்தலைவர் ஹர்தீப் நிஜ்ஜார் கொலை செய்யப்பட்டதிலும் தொடர்பு கொண்டிருப்பதாக குற்றம் சாட்டப்பட்டுள்ளது. சமீபத்தில் ராஷ்ட்ரிய கர்னி சேனா தலைவர் ராஜ் ஷெகாவத் வெளியிட்ட அறிக்கையில் லாரன்ஸ் பிஷ்னோயை கொலை செய்யும் போலீஸ் அதிகாரிக்கு 11 லட்சம் சன்மானமாக வழங்கப்படும் என்று அறிவித்தார். லாரன்ஸ் பிஷ்னோய் சிறையில் இருந்து கொண்டே வெளியில் இருக்கும் தனது 700 கூட்டாளிகள் மூலம் குற்றங்களில் ஈடுபட்டு வருகிறான் என்பது குறிப்பிடத்தக்கது.!
Junior Vikatan-ன் பிரத்யேக Whatsapp Group...
இணைவதற்கு இங்கே க்ளிக் செய்யவும்... https://tinyurl.com/2b963ppb
வணக்கம்,
BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://tinyurl.com/2b963ppb
