அஜித் தற்போது `விடாமுயற்சி', `குட் பேட் அக்லி' என இரண்டு திரைப்படங்களை கைவசம் வைத்திருக்கிறார்.

மகிழ் திருமேனி இயக்கத்தில் உருவாகியிருக்கிற `விடாமுயற்சி' திரைப்படம் பொங்கல் பண்டிகையை முன்னிட்டு வெளியாகிறது. இத்திரைப்படத்தின் டப்பிங் பணிகளை அஜர்பைஜானில் வைத்தே சமீபத்தில் முடித்திருந்தார் அஜித். இத்திரைப்படத்தில் அஜித்துடன் த்ரிஷா, அர்ஜூன், ரெஜினா உட்பட பலரும் நடிக்கின்றனர். மேலும், படத்திற்கு அனிருத் இசையமைக்கிறார்.

மற்றொரு பக்கம் அஜித் `குட் பேட் அக்லி' திரைப்படத்தின் படப்பிடிப்பு பரபரப்பாக இருக்கிறார் என்கிற செய்தி குறித்து நாம் கேள்விபட்டிருப்போம். தற்போது அத்திரைப்படத்தில் அஜித் நடிக்கும் காட்சிகளின் படப்பிடிப்பு முடிவு பெற்றிருக்கிறது. இது தொடர்பாக நெகிழ்ந்து தனது சமூக வலைதளப் பக்கத்தில் பதிவிட்டிருக்கிறார் இயக்குநர் ஆதிக் ரவிச்சந்திரன்.

அவர், ``எனக்கு இப்படியான வாழ்நாள் வாய்ப்பைக் கொடுத்த அஜித் சாருக்கு நன்றியை தெரிவித்துக் கொள்கிறேன். என்னுடைய கனவு நிறைவேறிவிட்டது. லவ் யூ அஜித் சார். இது அஜித் சாரின் கடைசி நாள் படப்பிடிப்பு. இதுவொரு அழகான பயணமாக எனக்கு அமைந்தது.'' எனப் பதிவிட்டிருக்கிறார்.

`குட் பேட் அக்லி' திரைப்படத்தில் அஜித்துடன் பிரசன்னா, அர்ஜூன் தாஸ் நடிக்கிறார்கள். 17 வருட இடைவெளிக்குப் பிறகு இத்திரைப்படத்தின் மூலம் ஜி.வி. பிரகாஷ் அஜித் படத்திற்கு இசையமைப்பாளராக களமிறங்கியிருக்கிறார். இத்திரைப்படம் பொங்கலுக்கு வெளியாவதாக அறிவித்திருந்தனர். ஆனால், அன்றைய தேதியில் `விடாமுயற்சி' திரைப்படம் வெளியாவதால் `குட் பேட் அக்லி' திரைப்படத்தின் ரிலீஸ் தள்ளிப்போகும் என எதிர்பார்க்கப்படுகிறது.