விக்ரம் ராஜேஷ்வர் மற்றும் அருண் கேஷவ் இயக்கத்தில் வைபவ், அதுல்யா, ரெடின் கிங்ஸ்லி, ஆனந்த் ராஜ், மொட்ட ராஜேந்திரன், ஜான் விஜய் உள்ளிட்டோர் நடிப்பில் உருவாகியுள்ள திரைப்படம் 'Chennai City Gangsters'.
டி.இமான் இசையமைத்திருக்கும் இத்திரைப்படத்தின் இசை வெளியீட்டு விழா சென்னையில் இன்று நடைபெற்றது. இதில் சிறப்பு விருந்தினராக அருண் விஜய் கலந்துகொண்டிருந்தார். டி. இமான், வைபவ், ரெடின் கிங்ஸ்லி உள்ளிட்ட படக்குழுவினரும் இதில் கலந்துகொண்டிருந்தனர்.
இவ்விழாவில் பேசிய இசையமைப்பாளர் டி.இமான், "இப்படத்திற்கு இசையமைத்தது எனக்கு ரொம்பவும் மகிழ்ச்சியாக இருக்கிறது. காரணம்; சரியான, பயிற்சி பெற்ற, முறையான பின்னணி இசை பாடகர்கள் இப்படத்தின் பாடல்களை பாடியிருக்கின்றனர்.
இதை ரொம்ப நல்ல விஷயமாக நான் பார்க்கிறேன். பொதுவாகப் படங்களில் நடிகர், நடிகைகளை பாட வைத்தாக வேண்டும் என்று அழுத்தம் கொடுப்பார்கள். அந்த அழுத்தமெல்லாம் இப்படத்தில் எனக்கில்லை. சரியான, முறையான பாடகர்கள் இப்படத்தின் பாடல்களைப் பாடியிருப்பது கூடுதல் சந்தோஷமாகப் பார்க்கிறேன்.
கார்த்திக், விஜய் பிரகாஷ், சின்மயி, ஹரி சரண், கானா தரணி, கானா குணா எல்லாரும் முறையாக பயிற்சி பெற்ற பாடகர்கள். இசையையும், பாடலையும் தொழிலாகவும், வாழ்க்கையாகவும் கொண்டிருப்பவர்கள். இதுபோன்ற முறையான பாடகர்களை இப்படத்தில் பாட வைத்திருப்பது மிகுந்த மகிழ்ச்சியை எனக்குத் தருகிறது" என்று மனம் திறந்து பேசியிருக்கிறார்.
